Alisa Dudaj^®Modë me Rrënjë në Traditë.

Alisa Dudaj është një stiliste vendase që po lë gjurmë në modë me markën që mban emrin e saj. E frymëzuar nga folklori dhe mitologjia e pasur shqiptare, ajo krijon veshje ku tradita ndërthuret natyrshëm me modën avangardë.

Sfida ishte të krijonim një identitet të markës që të shprehte qasjen eksperimentale të Alisa Dudaj dhe të nderonte rrënjët e saj në folklorin shqiptar. Dizajni duhej të evokonte frymëzimet e markës dhe njëkohësisht të ishte mjaftueshëm fleksibël për t’i lënë veshjet në qendër.

E ndërtuam identitetin rreth historisë dhe mitologjisë shqiptare, të frymëzuar nga Bija e Diellit dhe e Hënës dhe një gdhendje e dokumentuar nga Edith Durham në Shqipërinë e Veriut. Kjo figurë u bë emblema e markës, duke lidhur traditën e punimit me dorë me qasjen eksperimentale të Alisa Dudaj ndaj modës. Pjesën tjetër të identitetit e mbajtëm qëllimisht minimale, me një paletë të bardhë të thyer dhe të zezë të zbutur, si dhe një tipografi të fortë pa serife. Kështu, veshjet mbeten në qendër dhe njëkohësisht forcohet lidhja e markës me trashëgiminë dhe dizajnin bashkëkohor.